Содержанийышке куснаш

Шурик

Мегавики гыч
Тергыме статья
Шурик
Александр Сергеевич Тимофеев
«Операция „Ы“ и другие приключения Шурика» фильм гыч кадр-влак (1965)
«Операция „Ы“ и другие приключения Шурика» фильм гыч кадр-влак (1965)
Появление «Операция „Ы“ и другие приключения Шурика»
Исчезновение «Старые песни о главном 3» (оригинал),
«Иван Васильевич меняет всё» (ремейк)
Исполнитель роли Александр Демьяненко (оригинал),
Дмитрий Шаракоис,
Демис Карибидис (ремейк)
Создатель Леонид Гайдай
Информация
Прозвище Шурик
Пол пӧръеҥ
Дата рождения 1942 ий
Род занятий Оригиналыште: студент, фольклорист, инженер-изобретатель
Ремейкыште: журналист, IT-специалист
Семья
Семья пелашыже — Зинаида Михайловна Тимофеева («Иван Васильевич меняет профессию», «Иван Васильевич меняет всё»)
Отношения Лида («Операция „Ы“»), Нина («Кавказская пленница», «Кавказская пленница!»)
Логотип РУВИКИ.Медиа РУВИКИ.Медиаште медиафайл-влак

Шурик (Александр Сергеевич Тимофеев) — режиссёр Леонид Гайдайын кумдан палыме совет комедийлаштыже лӱмлӧ персонаж, самырык студент, кугышинчан интеллигент, тудо эреак оҥай приключенийышке логаледа. Шурикын рольжым РСФСР-ын калык артистше, дубляж актёр Александр Демьяненко модын.

Герой Леонид Гайдайын 1960 ий гыч 1970 ий марте войзымо кум совет комедийыштыже коеш. Шурик ончышо-влак ончыко тӱрлӧ сынан да тӱрлӧ тӱжвал тӱсан толын шогалеш. Ик фильмыште тудо студент, весыште — инженер-изобретатель, вара журналист да IT-специалист. ««Ы» операций да Шурикын моло приключенийже» ден «Кавказысе пленнице, але Шурикын у приключенийже» фильмлаште тудо ош рвезе лийын, а «Иван Васильевич профессийым вашталта» сӱретыште шемалге лийын.

Шурик нерген икымше фильм дене пашам ышташ Гайдай 1964 ийыште тӱҥалын. Эн ончычшо тӱҥ герой Владик лӱмым нумалшаш улмаш, но ончышо-влаклан Владлен (Владимир Ильич Ленин) дене ынже келыштаралт манын, тудым вашталташ логалын. Тиде персонажым шочыктымо годым режиссёр Чарли Чарлинын образше дене кумылаҥын[1].

Шурик тыгак 2014 ийысе «Кавказысе пленнице!» ремейкын да экраныш 2023 ийыште лекше «Иван Васильевич чыла вашталта» пародийын тӱҥ персонажше улеш. Шурикын рольжым тиде проектлаште актёр-влак Дмитрий Шаракоис (Сергей Бурунов йӱкаҥден) да Демис Карабидис модыныт.

Персонажын участвоватлыман фильм-влак

  • «Ы» операций да Шурикын моло приключенийже-влак» (1965)[2][3].
  • «Кавказысе пленнице, але Шурикын у приключенийже» (1967)[2][3].
  • «Иван Васильевич профессийым вашталта» (1973)[2][3].
  • «Нине ӱшанаш лийдыме музыкант-влак, але Шурикын у омым ужмыжо» (1977)[2].
  • «Тӱҥ нерген тошто муро-влак-2» (1997, изирак камео)[4].
  • «Тӱҥ нерген тошто муро-влак-3» (1998; «Иван Васильевич...» фильмын сюжетшым умбакыже изишак шуя)[5][6]
  • «Кавказысе пленнице!» (2014, оригинальный лентын ремейкше)[2][3].
  • «Иван Васильевич чыла вашталта» (2023; пародий да «Иван Васильевичын...» изирак ремейкше)[3].

Персонажын характеристикыже

1965 ийыште совет кинематографыш у персонаж — шинчалыкым чийыше Шурик лӱман сымыстарыше да тыматле, совет калыкын шӱмжым сеҥен налше студент — толын лектын. Ик жапыштак шонкалышан да воштылчыкан, вожылшо, поро, ойгырыдымо да эреак тунеммаште да пашаште тыршыше Шурик чӱчкыдынак шотдымо ситуацийыш логалеш да молылан полшаш ямде[7]. Тиде геройым шочыкташ Леонид Гайдайым Чарли Чаплинын образше кумылаҥден[1][7][8].

Шурикын персонажше Леонид Гайдайын 1960-1970 ийлаште войзымо кум совет комедийыштыже[9], концерт-фильмыште, тыгак 2014 ийыште лукмо ремейкыште, экраныш 2023 ийыште лекше «Иван Васильевич чыла вашталта» пародийыште коеш. Тудо тӱрлӧ рольышто толын шогалеш: студент, инженер-изобретатель, журналист, айтишник. ««Ы» операций да Шурикын моло приключенийже» ден «Кавказысе пленнице, але Шурикын у приключенийже» фильмлаште тудо ош рвезе лийын, а «Иван Васильевич профессийым вашталта» сӱретыште шемалгыш савырнен[8][10].

Леонид Гайдайын авторстван совет комедийлаштыже РСФСР-ын калык артистше, дубляж актёр Александр Демьяненко модын. 2014 ийысе «Кавказысе пленнице!» совет комедийын ремейкыштыже тиде рольым актёр Дмитрий Шаракоис модын (Сергей Бурунов йӱкаҥден). 2023 ийыште экраныш «Иван Васильевич чыла вашталта» фильм лектын, тушто персонажым Демис Карибидис шыҥдарен[10].

Кинофильмлаште геройын историйже

1965 ийыште экраныш лекше да кум киноновелле гыч шогышо «„Ы“ операций да Шурикын моло приключенийже-влак» кок ий жап годым ончыктымаште ончылно лийын[1][7].

Шурик — Политехник институтын ош ӱпан самырык студентше, «юмын шӧршудо» орол ковай дене пӧлемым айла. Чоҥымашыште ешартыш оксалан ышта («Напарник») новелле[9], кӱлдымаш да романтикан историйыш логаледа, Лида дене палыме лиеш («Шинчалан коймаш» новелле) да агаш толышо-влак дене кучедалеш («„Ы“» операций). Тудо физике дене экзаменым пеш сайын куча, поэзийыште умыла, осал еҥ-влакым — Лӱдшым, Балбесым да Ужшо-Колшым сеҥа (Юрий Никулин, Георгий Вицин, Евгений Моргунов) да йолагай-алкоголик Федям (Алексей Смирнов) уэш шуара[7][10].

1967 ийыште «Кавказысе пленнице, але Шурикын у приключенийже-влак» сиквел лектын. Комедийыште Шурик Кавказыш верысе фольклорым погаш этнографий экспедицийыш кайыше студент лиеш, но тудым самырык ӱдыр Нинан шолыштмашке ушат да тудо ӱдырым утара[1]. «„Ы“ операций да Шурикын моло приключенийже-влак» фильмын кум новеллыже, тыгак Шурик нерген «Кавказысе пленнице» кокымшо фильм Чарли Чаплинын, Гарольд Ллойдын да Бастер Китонын модман йӱкдымӧ комедий-влакын сыныштым ушештарат[7][10].

«Иван Васильевич профессийым вашталта» вес фильмыште ончышо-влак Шурикым ынде кугемын кайышым да пагалыме шанчызе-изобретательым ужыныт[9]. Шурикын персонажше икымше гана тичмаш лӱмым налын — Александр Сергеевич Тимофеев, да экраныште тыгак шемалге ӱпан лийын лектын. Тиде фантастике комедий 1973 ийыште эн кумдан палыме фильм лийын[7][10].

Актёрым ойыркалымаш

Кызытсе обществе нерген комедиян фильмым войзаш режиссёр Леонид Гайдайын шонымашыже О. Генрин произведенийлажым кучылтман «Пашаче еҥ-влак» сӱрет лекмекыже шочын. Гайдайлан «Шотдымырак историй-влак» лӱман сценарий келшен, тушто йӧным муын моштышо, но чылаланат ӱшаныше шинчалыкан студент Владик Арьковын ужын приключенийже нерген каласкалалтеш. Сценарийын автормытшо Марк Слободской ден Яков Костюковский лийыныт, нунын кокла гыч иктыже режиссёр дене тудын «Вес тӱня гыч толшо каче» комедиян икымше проектшым ыштыме годым пырля тыршен[11]. 1964 ий шошым «„Ы“ операций да Шурикын моло приключенийже-влак» комедийын сценарийжым «Мосфильм» киностудийын пашаеҥже-влак пеҥгыдемденыт[1].

Эн ондак тӱҥ геройым Владик Арьков манаш шонен пыштеныт, но цензур, В. И. Ленин дене келшыдыме ассоциаций лийын кертме деч лӱдын, тиде шонымашым кораҥден. Но Гайдайлан тудын персонажшын кузе лӱмдалтмыже тӱҥ лийын огыл, тудлан лӱмышкӧ геройын тыглайлыкшым да эксцентрике койышыжым луктын ончыктышо иземдыме-шыматыме суффиксым ешараш йӧн улмо кӱлешан лийын. Тыге Владик Шурик манын уэш лӱмдалтын[7].

Шурикым 1964 ий кеҥежым кычалаш тӱҥалме. Студентын рольышкыжо тыгай актёр-влак темлалтыныт: Евгений Жариков, Андрей Миронов, Виталий Соломин, Олег Видов, Валерий Носик, Иван Бортник, Евгений Петросян, Александр Збруев, Геннадий Корольков да Всеволод Абдулов. Режиссёр Александр Демьяненком ойырен налын, тудо тунам Ленинградыште пашам ыштен[1].

Икымше съёмко

«„Ы“ операций да Шурикын моло приключенийже-влак» фильмым 1964 гыч 1965 ий пагытыште Москошто, Ленинградыште, Ялтыште да Одессыште войзеныт. Эн ондак тудым «Шотдымырак историй-влак» манаш палемдалтын. Икымше войзымо кече 1964 ий 27 июльышто «Мосфильм» киностудийыште лийын. «Милиций кудывечыште» сцене войзалтын, туштыжо «алкоголик, вуянче, йолагай граждан-влаклан» нарядым пуэденыт. Тиде шонымашым Гайдайын шке биографийже гыч налме: 1942 ийыште армийыште служитлымыже годым военком толын, тудо Леонид Иовичлан тӱрлӧ сарзе подразделенийыш пураш темлен, а Гайдай уло спискым йӱкын йоҥгалтараш йодын[7][12]. Шуко комедий сцене-влакым актёрмыт вигай съёмкым эртарыме жапыште шонен луктыныт. Мутлан, йошкар арака улшо шоя вӱран шонымаш Юрий Никулинын шочын[7].

Шыжым войзышо тӱшка Одессыш куснен толын, тыште «Шинчалан коймаш» новелле гыч «Лидан пӧртшӧ воктен» эпизод, да тыгак икымше новелле гыч стройплощадкысе сцене ужаш войзалтын. 12 декабрьыште актёр-влак Ленинградыш действий телым эртыман кумшо новеллым войзаш тарваненыт, но олаште лум шагал лийын. Лу грузовик дене кондымо лум съёмкым тӱҥалме деч ончыч шуленат шуктен да искусственный лумым кучылташ пернен. Съёмко 1965 ий апрель тӱҥалтыште мучашлалтын, а кинопрокатыш август кыдалне лектын[7].

Александр Демьяненкон пӱрымашыжлан персонажшын шӱкалтышыже

Совет экраныште Шурикын образшым шыҥдарыше Александр Демьяненко, актёр деке чап тылеч ятыр ончыч толын гынат, Гайдайын комедийже-влакын лекмышт деч вара ик роль пелен кылдалтше семын лийын. Виллен Азаровын 1962 ийыште ик эн кумдан палыме лийше «Кугу лийше йоча-влак» комедийже ончыктымашке лекме деч вара тудын фотографийже-влак киосклаште ужалалтыныт да журнал-влакын комыштым сӧрастареныт. Демьяненкон моло кугу пашаже «Яра рейс» психологий драме (1962) да «Кугыжаныш преступник» детектив (1964) лийыныт. Эше ик ушеш кодшо роль семын« Пурышылан тыныс» фильмыште лейтенант Ивлевын образше лийын. Но Шурикын рольжо почеш пеш оҥай да чылаланат ӱшаныше студент дене иктешлалтмаш актёрлан келшыше рольым налаш мешаен, тидлан кӧра тудо экранышке шуэн коеден да тидын шотышто чот шыдешкен. Тудым войзымым чарнен огытыл гынат, сай рольым темлымаш тетла тудлан лийын огытыл[1][8][11][12].

Шурик XXI курымышто

Шурик кызытсе киноштат умбакыже ила. 2014 ийыште тудо режиссёр Максим Воронковын «Кавказысе пленнице!» совет комедийын ремейкыштыже экраныш пӧртылын. Тыште тудо этнографийлык экспедицийыште улшо студент семын огыл, а шке видеокамерыжан профессионал журналист семын ончыкталтын, тидын годым тудын тӱжвал тӱсшӧ да койышыжо кугунак вашталтын огытыл. Тиде рольым актёр Дмитрий Шаракоис шыҥдарен, тудым Сергей Бурунов йӱкаҥден[1].

2023 ий 31 декабрьыште ончышо-влак режиссёрмыт Михаил Семичев ден Роман Кимын войзымо «Иван Васильевич чыла вашталта» фильмым ужыныт. Тиде проектыште Шурик тыглай инженер гыч гениальный айтишник-фрилансерыш савырнен, тудо шке пачерыштыже жап машинам чоҥен, но тиде гана тудо VPN гоч веле пашам ышта. Ынде тудо эртыше жапыш, тӱнямбал историйлан нунын ыштыме чыла эҥгекым тӧрлаташ манын, мошенник Милославский дене пырля веле огыл, тыгак чын Иван Грозный дене пырля кайышаш. Сӱретыште тӱҥ геройын рольжым Демис Карибидис модын[3][13].

Геройым ончыктышо сӱретан скульптур-влак

Гайдайын комедийже-влакын премьерышт деч вара икмыняр лу ий эртымек, элнан тӱрлӧ луклаштыже Александр Демьяненко ден Наталья Селезнёван модмо Шурик ден Лидан[9] персонажыштлан пӧлеклалтше скульптур композиций-влак лектыныт. Нуным Плеханов лӱмеш Моско экономике институт ончылан, Есенин лӱмеш Рязаньысе кугыжаныш университет воктене да Кубаньысе кугыжаныш технологий университет ваштареш шындыме. Тыгак «Шурик» семын палыме скульптур Тольяттисе кугыжаныш университетын тӱҥ корпусшын тошкалтышыже-влакым сӧрастара — тудо занятийыш вашкыше студентым ончыкта[1][14].

  • Шурик ден Лидалан шарныктыш Рязаньысе кугыжаныш университет воктене
    Шурик ден Лидалан шарныктыш Рязаньысе кугыжаныш университет воктене
  • Шурик ден Лидалан шарныктыш Краснодарысе рӱдӧ аллейыште
    Шурик ден Лидалан шарныктыш Краснодарысе рӱдӧ аллейыште

Тыгак ончо

Палемдымаш

  1. ↑ 1,0 1,1 1,2 1,3 1,4 1,5 1,6 1,7 1,8 Кто такой Шурик из «Кавказской пленницы» и откуда он взялся: история самого родного персонажа советского кино. Комсомольская правда. Тергыме кече: 27 шыжа 2023.
  2. ↑ 2,0 2,1 2,2 2,3 2,4 Фильмы про Шурика. Film.ru. Тергыме кече: 28 теле 2023.
  3. ↑ 3,0 3,1 3,2 3,3 3,4 3,5 Шурик (Александр Сергеевич Тимофеев). Вокруг ТВ. Тергыме кече: 28 теле 2023.
  4. ↑ Старые песни о главном–2 (1997). Кино-театр.ру. Тергыме кече: 28 теле 2023.
  5. ↑ Старые песни о главном 3 (ТВ, 1997). Кинопоиск. Тергыме кече: 28 теле 2023.
  6. ↑ Старые песни о главном–3 (1998). Кино-театр.ру. Тергыме кече: 28 теле 2023.
  7. ↑ 7,00 7,01 7,02 7,03 7,04 7,05 7,06 7,07 7,08 7,09 Учись, студент: как в советском кино появился Шурик. mos.ru (25 шорыкйол 2021). Тергыме кече: 28 теле 2023.
  8. ↑ 8,0 8,1 8,2 Шурик. Вечно молодой, вечно смешной. Главный герой легендарных советских комедий. Люди (21 пеледыш 2014). Тергыме кече: 28 теле 2023.
  9. ↑ 9,0 9,1 9,2 9,3 Сколько Шуриков на самом деле? Интересные факты про любимого персонажа из фильмов Гайдая. ctv.by (20 сорла 2020). Тергыме кече: 28 теле 2023.
  10. ↑ 10,0 10,1 10,2 10,3 10,4 Алексей Ковальский. Шурик. 24СМИ. Тергыме кече: 28 теле 2023.
  11. ↑ 11,0 11,1 Сергей Капков. Он всё-таки простил Шурика: заложник успеха Александр Демьяненко. ТАСС (30 ага 2022). Тергыме кече: 28 теле 2023.
  12. ↑ 12,0 12,1 Александр Алексеенко. Народный любимец Шурик: для актёра Демьяненко эта роль стала роковой. Экспресс-новости (31 ага 2019). Тергыме кече: 28 теле 2023.
  13. ↑ Елена Королёва. ТНТ и создатели «СамоИронии судьбы» готовят новогодний фильм «Иван Васильевич меняет всё!» Киноафиша (9 шыжа 2023). Тергыме кече: 28 теле 2023.
  14. ↑ Где можно увидеть памятники героям всенародно любимых комедий Гайдая, и что сделать, чтобы они принесли удачу. kulturologia.ru. Тергыме кече: 28 теле 2023.

Литератур

  • Сергей Капков. Александр Демьяненко // Короли комедии. — М.: Алгоритм, 2003. — 398 с. — ISBN 5926500958.
  • Лев Лайнер. «Не жди меня мама, хорошего сына…» // Весёлая троица — Вицин, Моргунов, Никулин. — М.: Центрполиграф, 2000. — 317 с. — ISBN 5227008736.
  • Волков А. Кавказская пленница, или Новые приключения Шурика // Российский иллюзион / Научный редактор Л. А. Парфёнов. — М.: Материк; НИИ киноискусства, 2003. — 732 с. — ISBN 5-85646-100-2.

Кылвер-влак

Кышкар:Трус, Балбес и Бывалый

"https://mhr.megawiki.ru/w/index.php?title=Шурик&oldid=33561" гыч налме